SAT imtahanlarında saxtakarlıq hallarına yol verildiyi iddia olunur.

Dövlət İmtahan Mərkəzinin (DİM) sədri Məleykə Abbaszadə müsahibələrinin birində bu növ halların mövcudluğunu təsdiqləyib. Xanım sədr bildirib ki, DİM tərəfindən keçirilən qəbul imtahanlarında 20-30 bal toplaya bilməyən abituriyentlər beynəlxalq SAT imtahanında maksimum nəticə göstərirlər.

Qurum rəhbərinin sözlərinə görə, bu cür kəskin fərq real ola bilməz. Çünki SAT imtahanının riyaziyyat bloku daha mürəkkəbdir və yerli imtahanlarda minimum nəticə göstərənlərin bu sınaqdan ən yüksək bal alması normal görünmür.

BUTA.TV xəbər verir ki, təhsil eksperti Elçin Əfəndi də Baku TV-yə açıqlamasında mövzu ilə bağlı ciddi məqamlara toxunub. O bildirib ki, bəzi şəxslər imtahan suallarını qanunsuz yollarla əldə edirlər:

“Biz dəfələrlə müşahidə etmişik ki, eyni imtahan sualları yaxın region ölkələrində fərqli tarixlərdə keçirilərkən, prosesin təşkilində iştirak edən şəxslər və ya digər vasitəçilər tərəfindən öncədən satılır. Bəzi hallarda Azərbaycan vətəndaşlarının qəsdən qonşu ölkələrdə təşkil olunan SAT imtahanlarına yönləndirildiklərini və ya orada imtahan verməkdə maraqlı olduqlarını görürük. Bu da ondan xəbər verir ki, həmin şəxslər suallarla öncədən tanışdırlar.

Məsələn, 2024 və 2025-ci illərdə qonşu Gürcüstanda təşkil edilən SAT imtahanlarının nəticələri rəsmi olaraq tanınmadı. Məlum oldu ki, buna səbəb imtahan suallarının sızdırılması olub”, – deyə ekspert qeyd edib.

• ABŞ İrana yenidən hücuma başladı
• Bakı-Şamaxı yolu çökdü - Video
• “Mənə verdiyi suala görə vəzifəsindən azad edilib” - Qusmanı misal çəkdi+Video
• Ukraynanın Baş naziri istefa verdi
• “Turbo.az” və “Bina.az”la bağlı gözlənilməz - Qərar
• “Atasına deyir ki, meyitini gətirin, əlimi sürtüm” - Gözdən əlil ananın fəryadı+Video
• TikTok Azərbaycanda 600 minə yaxın videonu sildi
• AQTA-dan bu məhsullarla bağlı çağırış