ABŞ-ın Viskonsin ştatından konqresmen Tom Tiffany mindiyi kiçik təyyarənin texniki nasazlıq üzündən Lake Wausau gölünə məcburi eniş etməsindən sonra pilotla birlikdə üzərək xilas olduğunu bildirib.

BUTA.TV bbc.com-a istinadən xəbər verir ki, hadisə şənbə axşamı baş verib və hər iki nəfər xəfif xəsarət alıb.

"Təyyarə suya batmağa başlayanda biz oradan çıxıb dayaz sahəyə üzdük və xilasedicilər bizə qayıqla çatana qədər gözlədik," - deyə Tiffany sosial mediada yazıb.

Marathon County Şerif İdarəsinin məlumatına görə, hadisə barədə 911-ə zəng yerli vaxtla 20:49-da daxil olub, xilasedicilər isə cütlüyü təxminən 15 dəqiqə sonra qayıqla xilas edib. Təyyarədə yalnız Tiffany və pilot olub.

Tiffany bildirib ki, sağ qaşının üstündə kiçik yara alıb. Federal Aviasiya Administrasiyası (FAA) və Milli Nəqliyyat Təhlükəsizliyi Şurası (NTSB) hadisənin səbəbini araşdıracaq.