Ekofəalların Laçın-Xankəndi yolundakı aksiyasının əsas nailiyyəti odur ki, artıq otuz gündür Ermənistandan Qarabağa silah və mina daşınmır, oradan silahlı qruplar keçmir, qeyri-qanuni iqtisadi fəaliyyətin qarşısı alınıb.

Bu sözləri BUTA.TV-a ekofəalların Laçın-Xankəndi yolunda keçirdiyi aksiyanın bir ayının tamam olması haqqında açıqlamasında politoloq Fərhad Məmmədov deyib.

Politoloq sözügedən məsələdə dövlətin və xalqın vahid mövqedən çıxış etdiyini vurğulayıb:

“Azərbaycan Ermənistanın Qarabağda məhdud subyektliliyini də şübhə altına aldı. Yəni Ermənistan Xankəndiyə nə qədər qaz və işıq versə, maliyyə ayırsa da, Qarabağın ölkəmizin nəzarəti altında olduğunu İrəvana göstərdik. Digər tərəfdən, biz bütün dünyaya və bölgədə maraqlı olan ölkələrə milli məsələlərdə cəmiyyətin və dövlətin vahid mövqe nümayiş etdirdiyini bir daha sübut etdik. Heç bir təzyiq dövlətimizin və xalqımızın bu mövqeyini sarsıda bilməz”.

Fərhad Məmmədov bildirib ki, əsas hədəfimiz Laçın yoluna nəzarətin institutlaşdırılmasıdır:

“Yəni ya şərti sərhədə giriş-çıxışa nəzarət formalaşdırılmalı, yaxud da yol boyunca nəzarət təmin olunmalıdır. Digər əsas nailiyyətlərdən biri Qarabağdakı ermənilərə talelərinin ancaq Azərbaycanla bağlı ola biləcəyi, razılaşmayanların isə oranı tərk etməli olduğu mesajının verilməsidir. Bütün dünya bir daha gördü ki, dövlətimiz Qarabağla bağlı hansısa güzəştə getməyəcək, bununla bağlı hansısa xarici ölkə və qurumla müzakirədən belə söz gedə bilməz”.

Qeyd edək ki, ötən ilin dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrdən sonra Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Qarabağdakı “Qızılbulaq” qızıl və “Dəmirli” mis-molibden yataqlarında qanunsuz istismar və ekoloji fəsadlarla bağlı monitorinq aparmalı idi. Lakin monitorinq sülhməramlıların fəaliyyətsizliyi ucbatından baş tutmadı. Bundan sonra dekabrın 12-də Laçın-Xankəndi yolunda ekofəallar aksiyası başladı.

• İlham Əliyevdən Naxçıvanla bağlı yeni qərar
• ABŞ iqlim maliyyələşməsindən yayınır - Edou
• Prezidentdən qərar: Bu agentlik ləğv olunur
• Berbok Bakıda, görün, nələrlə məşuldur – İnanılmaz
• Milli Məclisdən Paşinyana cavab: Bu, ərazi iddiasıdır!
• COP29-da mühüm razılıq əldə olundu
• 70 kq qızılla saxlanılan diplomatın kimliyi bilindi
• Taksist qonağı hava limanından 139 manata gətirdi - DİN işə qarışdı