Qeyri-rəsmi münasibətdə olduğu qadını hotelin 6-cı mərtəbəsindən atan şəxsə hökm oxunub.

Hadisə 2023-cü ilin fevral ayında "AF Hotel"də baş verib.

Belə ki, həmin il fevralın 16-da Şükür Qənbərov 22-ci Polis Bölməsinə gələrək, qeyri-rəsmi münasibətdə olduğu qadını R.Behbudov küçəsi, 59-da yerləşən "AF Hotel"in 6-cı mərtəbəsinin pəncərəsindən atması barədə məlumat verib.

1997-ci il təvəllüdlü Sücayət İbrahimova ağır vəziyyətdə Kiliniki Tibbi Mərkəzə çatdırılıb. Araşdırma zamanı məlum olub ki, hadisə hotelin 6-cı mərtəbəsində 1603 saylı otaqda baş verib.

Nəsimi rayon prokurorluğunda CM-nin 29,120.1-ci (qəsdən adam öldürməyə cəhd) maddəsi ilə cinayət işi başlanılıb.

İstintaqla müəyyən edilib ki, fevralın 16-ı saat 19:25-da Şükür Qənbərov qeyri-rəsmi münasibətdə olduğu Sücayət İbrahimova və onun 2 azyaşlı övladı ilə birlikdə hotelə gəlib. Hotelin 6-cı mərtəbəsində yerləşən otaqda onlar intim münasibətdə olublar. Sonra tərəflər arasında qısqanclıq zəminində mübahisə düşüb.

Mübahisə zəminində Ş.Qəmbərov qadının baş nahiyəsinə zərbələr vurub, sonra isə onu pəncərədən atıb. Nəticədə qadın hotelin 3-cü mərtəbəsində olan tikilinin dam örtüyünün üzərinə düşüb. Qadın hadisə yerinə çağırılmış Təcili Tibbi Yardım briqadasının müşayiəti ilə Kliniki Tibbi Mərkəzə çatdırılıb və həyatı xilas edilib.

İş üzrə dindirilmiş Şükür Qəmbərov bildirib ki, fevralın 16-da Lənkərandan Bakıya qayıdıb və münasibətdə olduğu Sücayət İbrahimovaya zəng edərək görüşmək istədiyini bildirib. Sonra onun yaşadığı ünvana gedib və qadına hotelə getməyi təkilf edib. Ş.Qəmbərov qadını və uşaqları götürüb hotelə gətirib. Onlar bir günlük hotelin 6-cı mərtəbəsində yerləşən 1603 saylı otağı götürüblər.

Şükür Qəmbərov qadınla intim münasibətdə olduqdan sonra ona yenidən rayona qayıtmalı olduğunu deyib. Bu zaman onlar arasında mübahisə düşüb. Qadın Ş.Qəmbərova "səni rayonda gözləyən qızlar var, sən başqaları ilə danışırsan” deyib. Qısqanclıq zəmnində yaranmış mübahisə zamanı, qadın onu söyməyə başlayıb:

“Bu zaman onun üzünə sillə vurdum. Qapıya tərəf qaçanda arxadan tutdum və onu pəncərəyə tərəf gətirdim. Ayaqlarından qaldırıb, pəncərədən çölə atdım. Arxasınca baxdım. Yerə düşdüyündən əmin olandan sonra hamama keçib əllərimi yudum. Uşaqlara otaqdan çıxmamalarını və qayıdacağımı deyib polisə getdim. Özümü növbətçiyə təqdim edib baş verənləri danışdım”.

Zərərçəkmiş Sücayət İbrahimova bildirib ki, Şükür Qəmbərovla 2022-ci ilin aprel ayında tanış olub. Şükür onunla ailə həyatı quracağını deyib. "AF Hotel"də görüşüb, cinsi əlaqədə olublar. Dəfələrlə aralarında münaqişə olub.

2022-ci il iyunun 20-də Şükür onun uşağını döyüb. Oktyabrın 2-də Ağcabədi rayonunda bıçaqla xəsarət yetirib, barəsində cinayət işi başlanılıb və o bir neçə gündən sonra tutulub. Həmin il dekabrın 23-də Şükür məkəməyə qədər ev dustaqlığına buraxılıb. O vaxtdan fevralın 16-na kimi müxttəlif vaxtlarda Bakıda yerləşən hotellərdə görüşüblər. Münasibətdə olduğu ərəfədə, onun işləməsinə icazə vermədiyindən Şükürdən maddi asılılığı olub. Bundan əlavə, Qəmbərov müxtəlif əsassız bəhanələrlə mütəmadi olaraq yumruqla və taxta ilə onu döyüb. Bununla bağlı 2 dəfə - Qax və Xaçmaz rayonlarında polis şöbələrinə müraciət edib.

Məhkəmə iclasında Şükür Qənbərov ittiham üzrə özünü təqsirli bilməyib. Zərərçəkmiş təqsirləndirilən şəxsdən şikayətçi olmadığını bildirib.

Məhkəmə qənaətə gəlib ki, Şükür Qəmbərovun CM-nin 29,120.1-cü (qəsdən adam öldürməyə cəhd) maddəsində nəzərdə tutulmuş cinayət əməlini törətməsi tam sübuta yetirilib. Həmin əməl təqsirləndirilən şəxsin öz iradəsindən asılı olmayan səbəblərdən başa çatdırılmayıb.

Bakı Ağır Cinayətlər Məhkəməsinin hökmü ilə Şükür Qənbərov 8 il 6 ay müddətinə azadlıqdan məhrum olunub.\\News24.az

70 ölkə zalı tərk etdi, Azərbaycan qaldı — Türkiyədə sərt reaksiyalar: Elçibəyin helikopter tələbi xatırlandı 70 ölkə zalı tərk etdi, Azərbaycan qaldı — Türkiyədə sərt reaksiyalar: Elçibəyin helikopter tələbi xatırlandı