İsmayıllı rayonu Gəndov kəndində körpü çöküb.

BUTA.TV xəbər verir ki, bununla bağlı görüntü sosial şəbəkələrdə paylaşılıb.

Paylaşımda iddia edilir ki, söhbət İsmayıllı - Lahıc yolunun Girdiman çayı üzərindən keçən körpüdən gedir.

Sözügedən ərazidə sonuncu sel daşqınlarından sonra körpünün müəyyən hissələrində çökmələr müşahidə edilib.

Çökən ərazinin günbəgün genişlənməsi əhalinin narahatlığına səbəb olur. Yolun bu hissəsi bir neçə aydır bağlı olsa da, çöküntü davam edərsə, bir neçə gün sonra körpü tamamilə dağıla bilər.

İsmayıllı Rayon İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri Namiq Kərimov Oxu.az-a açıqlamasında sözügedən yolda çökmüş hissənin genişlənməsinin bir neçə gündür müşahidə edildiyini bildirib:

“Əvvəldən sözügedən körpüdə sel daşqınları səbəbindən müəyyən çökmələr müşahidə edilirdi. Sadəcə təəssüf ki, çökən hissənin əhatəsi bir az daha genişlənib. Bu problem İsmayıllıda sonuncu sel daşqınlarından sonra qeydə alınıb, körpünün altında boşalmalar olub. Lakin çökən hissə son iki-üç gün ərzində çox genişlənib. Bununla bağlı rayon üzrə yol istismar idarəsinə, eləcə də Azərbaycan Avtomobil Yolları Dövlət Agentliyinə məlumat verilib. Həmin çökən hissə lent ilə bağlanıb, ərazidə tədbir görülür”.

Azərbaycan Avtomobil Yolları Dövlət Agentliyinin Mətbuat Xidmətinin rəhbəri Anar Nəcəfli bildirib ki, sözügedən körpüyə mütəxəssislərin iştirakı ilə baxış keçirilib:

“Sel suları İsmayıllı rayonu Gəndov kəndində yolun bir hissəsini yuyub. Artıq yaranmış problemin aradan qaldırılması istiqamətində işlərə başlanılıb”.

Xatırladaq ki, İsmayıllıda sonun sel daşqınları ötən il iyul-avqust aylarına təsadüf edib və çoxsaylı fəsadlar yaradıb.

• Bir çox qərəz və məkr görürük – Hacıyevdən mühüm
• “Rusiya ən azı 6 müstəqil dövlətə parçalanmalıdır...” 
• “Süni intellekt gələcəkdə bir çox tibbi ixtisasları əvəz edəcək”
• Bəstəkarın ölümünün təfərrüatı: Hadisə dənizdə olub...
• Azərbaycanla münasibətə görə ürəyim qan ağlayır - Kalaşnikov
• Rusiyada yaşayan azərbaycanlılara xəbərdarlıq
• Rusiyanın Azərbaycanla bağlı planı budur - Saakaşvili
• Azərbaycan diplomatları Xankəndidə toplaşır