Sentyabrın 1-də keçiriləcək növbədənkənar parlament seçkilərindən sonra ölkənin siyasi həyatında ciddi yeniliklərin olacağı gözlənilir. Sosial şəbəkələrdə vitse-spiker olacaq şəxslərin siyahısı da paylaşılmaqdadır.

İddialara görə, Böyük Quruluş Partiyasının sədri Fazil Mustafanın və deputat seçiləcəkləri təqdirdə Böyük Azərbaycan Partiyasının sədri Elşad Musayevlə Müsavat Partiyasının tanınmış funksioneri Arzu Səmədbəylinin də vitse-spiker olmaq şansı var.

Mövzu ilə bağlı Yenisabah.az-a danışan  Milli Məclisin deputatı Fazil Mustafa  bildirib ki, seçkiqabağı müxtəlif iddiaların səsləndirilməsi hər zaman olub:

“Təbii ki, yenilənmiş, qalib gəldiyimiz bir dövrdə ölkə parlamentinin yenidən formlaşması ölkə həyatında ciddi bir dəyişiklik stimulu verəcək hadisədir. Azərbaycan parlamentinin də həm Azərbaycan Prezidentinin apardığı möhtəşəm işlərə dəstək baxımından, həm də yeni bir islahat prosesini sürətləndirmək baxımından böyük rolu ola bilər. Yeni tərkib də yəqin ki, bu istiqamətdə böyük işlər görəcək.

Təbii ki, seçki dövründə müəyyən spekulyasiyalar ortaya atıla  bilər. Mən siyasi partiyanın rəhbəriyəm, namizədliyimi də vermişəm, partiya üzvlərimiz də namizədliyini verib. İndiki məqamda bizim diqqətimiz birinci növbədə seçkilərə yönəlib, ilk növbədə seçicilərin etimadını qazanmaq lazımdır. Biz bu istiqamətdə çalışırıq, qalan spekulyasiyalara qarışmaq istəmirəm”.

Millət vəkilinin sözlərinə görə, çalışdığı illər ərzində heç vaxt vəzifə uğrunda mübarizə aparmayıb və indi də belə bir niyyəti yoxdur:

“Mən həyatım boyu hansısa vəzifə uğrunda heç vaxt xüsusi bir iradə, istək ortaya qoymamışam, heç bunda maraqlı da deyiləm. Mən daha çox ölkədə maarifçilik işi aparmağı vəzifə olaraq görürəm. Cəhalətə qarşı mübarizəni özüm üçün vəzifə sayıram. Ona görə də rəsmi vəzifələrin harada və ya necə olması maraq dairəmdə olan məsələ deyil.

Mənim marağımda olan məsələ bu ölkənin yaxşı mənada aydınlığa qovuşmasıdır, gələcəyini sığorta altına almasıdır, xalqın cəhalətdən qurtulmasıdır.

Şəxsiyyətimizi, obrazımızı düşünərək bizi müxtəlif vəzifələrdə görmək istəyən insanlar ola bilər, bu da onların arzusudur və sayğı ilə yanaşıram. Lakin mən özüm özümü görmək istədiyim yerdəyəm. Hətta parlamentdə olmasam belə, elə həmin yerdəyəm. O yerdə ki, xalqa xidmət edir, onların faydası üçün çalışıram. Mənim üçün bundan ideal vəzifə yoxdur”.

• Bu məlumatlar Prezidentə təqdim ediləcək - Baş nazir
• Bakıdan xaricə birbaşa və tranzit aviareyslərin qiymətləri…
• Qarabağ və Şərqi Zəngəzura ayrılacaq vəsaitin həcmi...
• DYP-dən xəbərdarlıq: Bu yol 2 ay bağlı olacaq!
• Ərdoğan Pezeşkianla bu məsələni müzakirə etdi - Təfərrüat
• Maaş və pensiya artımı 2 milyondan çox vətəndaşı əhatə edəcək
• İlham Əliyev fərman imzaladı
• "Ekologiya postu" ərazisində ağaclar yandı, araşdırma aparılır