Hindistanın Baş naziri Narendra Modi avqustun 21-23-də Polşa və Ukraynaya rəsmi səfər edəcək. Bu, Rusiya-Ukrayna müharibəsi başlayandan sonra Narendra Modinin Kiyevə ilk səfəri olacaq.
BUTA.TV xəbər verir ki. bu barədə politoloq Elxan Şahinoğlu qeyd edib.
O bildirib ki, Modi iyunun 8-də Moskvaya səfər etmişdi:
“Putinlə görüş zamanı ikitərəfli tərəfdaşlığı gücləndirməkdə maraqlı olduğunu bildirmişdi. Modinin Rusiyaya səfəri Ukrayna və Qərb ölkələrində bir sıra suallar yaratdı. Modi bu sualları ortadan qaldırmaq üçün Kiyevə səfər etməyə qərar verib.
Dehli Rusiya ilə Ukrayna arasında dialoqun tərəfdarıdır. Narendra Modi iki ölkə arasındakı mübahisənin müharibə ilə həll olunmayacağı qənaətindədir. Dehli Pekin kimi Moskva ilə Kiyev arasında dialoqa töhfə verməyə hazır olduğunu bildirib. Məlumdur ki, Kiyev Pekinin vasitəçiliyini qəbul etməyib. Çünki Pekinin planında Rusiya ordusunun Ukrayna ərazisini tərki tələb olunmurdu. Dehlinin münaqişənin həlliylə bağlı konkret planı olmasa da, tərəflərlə işləməyə hazır olduğunu bəyan edib. Vaşinqton müharibənin dayandırılması üçün Pekinin Moskvaya təsir etməsini istəyərkən, Dehlidən də eyni siyasət aparmasını arzulayır. Ancaq problem ondadır ki, Kreml Ukrayna torpaqlarının işğalının rəsmiləşdirilməsindən başqa həll planı və vasitəçilik qəbul etmir.
Ukrayna xarici işlər naziri Dmitri Kuleba bir müddət əvvəl Hindistana səfər etmişdi. Hindistanın xarici işlər naziri Subrahmanyam Cayşankar ukraynalı həmkarı ilə görüşdə iki ölkə arasında təmasları genişləndirməkdə maraqlı olduğunu söyləmişdi. Narendra Modi iyun ayında “Böyük Yeddilər”in İtaliya toplantısında Ukrayna Prezidenti Vladimir Zelenski ilə görüşüb fikir mübadiləsi aparmışdı. Kiyev Hindistanın Ukrayna iqtisadiyyatına yatırım qoymasına da maraq göstərir.
Narendra Modi Kiyevdə sonra Varşavaya səfər edəcək. Modinin Ukraynadan sonra məhz Polşaya səfər etməsinin səbəbi aydındır. Ukrayna ilə sərhəd olan Polşa müharibədən əziyyət çəkən əsas Avropa ölkəsidir. Polşa Ukraynadan ən çox qaçqın qəbul edən ölkədir, Rusiya raketləri və təyyarələri zaman-zaman Polşa ərazisinə keçir. Bundan başqa, Avropada belə bir rəy formalaşıb ki, Rusiya Ukraynanı işğal edərsə, növbəti hədəf Polşa ola bilər. Bu mənada Narendra Modinin Polşaya səfəri Dehlinin Varşavanın narahatlığına şərik olduğunu anlamı daşıyır”.
- ADY 6 ayda 484 min tona yaxın kükürd və əlaqəli mallar daşıyıb
- Partlayışda ölən Zəhranın valideynləri də vəfat etdi - Yenilənib
- Elektron siqaretlərin mülki dövriyyəsi qadağan edilir
- Əcnəbilərin Azərbaycanda müvəqqəti olma müddəti... - Dəyişiklik
- Ağdaş yenə qaranlığa büründü, İH "pulumuz yoxdur" deyir
- City Garden Narimanov”: Premium yaşayışın yeni ünvanı
- “AzerTelecom” və “DE-CIX”in əməkdaşlığı ilə internet mübadiləsi mərkəzi - “AZE-İX” istifadəyə verilir
- Toxumçuluq sahəsində yeni dövlət rüsumları olacaq