Nepalda Himalay buzlağının çökməsi nəticəsində yaranan güclü daşqın və sürüşmələrin səbəb olduğu fəlakətdə ölənlərin sayı 1000-i ötüb. Təxminən 4500 nəfərin taleyi isə hələ də məlum deyil.

“BUTA.TV” xəbər verir ki, axtarış-xilasetmə əməliyyatları davam etdiyi bir vaxtda paytaxt Katmanduda yerləşən xəstəxanalardan birinin divarı yaxınlarını axtaran ailələr üçün son ümidlərdən birinə çevrilib.

Katmanduda xəstəxananın qarşısında uzanan təxminən 25 metrlik divar itkin düşən insanların fotoşəkilləri ilə tamamilə örtülüb.

Divarın, demək olar ki, hər əlçatan hissəsinə, eləcə də xəstəxananın xaricindəki sütunlara yüzlərlə fotoşəkil asılıb.

Günlərlə yaxınlarından xəbər ala bilməyən ailələr xəstəxanaya gələrək fotoşəkilləri nümayiş etdirir və kimsənin həmin şəxsləri tanıyacağına ümid edirlər.

Divardakı fotolar arasında uşaqların, ailələrin, turistlərin, zəvvarların və su elektrik stansiyalarında çalışan xarici işçilərin şəkilləri də var.

58 yaşlı sürücü Debu Sapkota da 83 yaşlı qayınanası və nəvəsinin fotolarını divara asmaq üçün xəstəxanaya gəlib. Hər iki şəxs daşqından zərər çəkmiş ərazidə itkin düşüb.

Sapkota bildirib ki, daşqından əvvəl ailəyə xəbərdarlıq edilib. Lakin onun sözlərinə görə, qayınanası “qaçmaq üçün çox yaşlı” olub. Nəvəsi yaşlı qadının qaçmasına kömək etməyə çalışsa da, hər ikisi sel sularının qarşısında aciz qalıb.

“Artıq onların sağ qaldığına ümidim yoxdur”, - deyə Sapkota bildirib. O, xəstəxanaya gəlməkdə məqsədinin “onların meyitlərini tapmaq” olduğunu söyləyib.

Xəstəxananın morqunun yaxınlığında daşqın və palçıqdan çıxarılan, lakin şəxsiyyəti müəyyən edilməyən insanların fotoşəkilləri də nümayiş etdirilir.

Qohumlar fotolara baxaraq daşqın və palçıq səbəbindən üz cizgiləri tanınmaz hala düşən insanların kimliyini müəyyən etməyə çalışırlar.

Polis xəstəxananın həyətində şəxsiyyətin müəyyənləşdirilməsi prosesinə kömək etmək üçün xüsusi bölmə yaradıb.

Fəlakətdən sonra xəstəxanaya gətirilən meyitlərə nəzarət edən polis məmuru Om Bahadur Rana bildirib ki, morqa 94 cəsəd gətirilib. Onun sözlərinə görə, həmin cəsədlərdən yalnız 12-nin şəxsiyyəti müəyyənləşdirilərək ailələrinə təhvil verilib.

Rana xəstəxanaya gətirilən və hələlik kimliyi müəyyən edilməyən şəxslərin hamısının Nepal vətəndaşı olduğunun ehtimal edildiyini bildirib.

İtkin düşənlərin axtarışı yalnız xəstəxana divarları ilə məhdudlaşmır.

Sağ qalanlar və itkin şəxslər barədə məlumatların toplandığı Nepal hökumətinin internet saytı da yardım məqsədilə çoxsaylı müraciətlər dərc edir.

Ailələr sosial mediada yayılan daşqın görüntülərini də diqqətlə araşdıraraq yaxınlarının izinə düşməyə çalışırlar.

Paylaşılan müraciətlərdən birində ailə üzvləri dünən palçığa ilişən və özünü xilas etməyə çalışan uşağın görüntülərini gördüklərini bildiriblər.

“Dünən palçığa ilişib qalmış bir uşağın özünü qurtarmağa çalışdığını göstərən video gördük. O, mənim qardaşım oğluna oxşayırdı”, - deyə ailə paylaşımında qeyd edib.

• Rusiyanın neft hasilatı çökür: Son 17 ildə....
• İranla diplomatik əlaqələri kəsdilər
• Rusiya və Almaniya müharibə vəziyyətindədir - Zumann
• 4500 talenin son ünvanı 25 metrlik “ümid divarı” oldu - Fotolar
• Goranboyda sursat anbarında partlayış oldu - Yenilənib - Video
• Ukraynada müharibəyə son qoymaq istəyirik - Putin
• İran İordaniyada ABŞ bazasını belə vurdu - Video
• Bunun İrəvan üçün müsbət nəticələri oldu - Putin