FIFA prezidenti Canni İnfantinonun UEFA-da baş katib olduğu dövrdə gənc qadın əməkdaşla münasibətdə olduğu və həmin qadının təşkilatdan ayrılarkən altırəqəmli məbləğdə ödəniş aldığı iddia edilir. UEFA isə ödənişi təsdiqləyib, lakin onun həmin dövrdə qüvvədə olan qaydalara uyğun həyata keçirildiyini bildirib.

“BUTA.TV” xəbər verir ki, “The Telegraph”ın araşdırmasına görə, hazırda FIFA prezidenti olan Canni İnfantinonun UEFA-nın baş katibi vəzifəsində çalışdığı dövrdə təşkilatda işləyən qadın əməkdaşla münasibətdə olduğu iddia edilir.

Məlumata görə, adı açıqlanmayan qadın İnfantino ilə münasibəti davam etdiyi vaxt UEFA-da daha yüksək vəzifəyə yüksəlib. Onun maaşının təxminən 30 faiz artırıldığı və illik gəlirinin 160 min İsveçrə frankına, yəni təxminən 147 min funt-sterlinqə çatdığı bildirilir.

Qadının UEFA-dan ayrılarkən isə altırəqəmli məbləğdə kompensasiya aldığı və təşkilatın onun biznes məktəbində MBA təhsilinin xərclərini də qarşıladığı bildirilir.

UEFA qadına işdən ayrılma ödənişi edildiyini və onun MBA təhsilinin maliyyələşdirildiyini təsdiqləyib. Lakin qurum həmin ödənişlərin o dövrdə qüvvədə olan əmək qaydalarına uyğun həyata keçirildiyini bildirib.

UEFA nümayəndəsi qeyd edib ki, bu qaydalar 2016-cı ildən etibarən daha da sərtləşdirilib və hazırda bütün əməkdaşlara, vəzifəsindən asılı olmayaraq, daha ciddi iş prinsipləri tətbiq olunur.

Mənbələrin iddiasına görə, qadının UEFA-dan ayrılması ilə bağlı kompensasiya məsələsi İnfantino ilə münasibətlərindən xəbərdar olduğu deyilən UEFA-nın ozamankı prezidenti Mişel Platininin etirazından sonra gündəmə gəlib.

“The Telegraph” yazır ki, UEFA qadının biznes məktəbində MBA təhsilini də maliyyələşdirib. Sözügedən təhsil proqramının illik xərcinin təxminən 45 min funt-sterlinq olduğu qeyd olunur.

Mənbələrin iddiasına görə, qadın UEFA-da işə inzibati vəzifədə başlayıb, daha sonra isə daha yüksək və gəlirli menecer vəzifəsinə keçirilib.

Onun sürətli karyera yüksəlişinin təşkilat daxilində suallar doğurduğu və İnfantinonun vəzifəsindən istifadə edərək ona üstünlük verdiyi barədə narahatlıqlar yarandığı iddia edilir.

Qadının təşkilatdan ayrıldıqdan sonra oxşar sahədə yeni vəzifə əldə etməsi üçün İnfantinonun əlaqələrindən istifadə etdiyi də irəli sürülür.

İnfantinonun nümayəndəsi ittihamları qəti şəkildə rədd edib.

FIFA-nın sözçüsü bildirib ki, İnfantino bu iddiaları “qətiyyən həqiqətə uyğun olmayan” məlumatlar hesab edir. Onun sözlərinə görə, UEFA və FIFA-da heç bir əməkdaş İnfantinonun davranışı ilə bağlı rəsmi şikayət verməyib.

FIFA həmçinin əməkdaşlarla bağlı bütün qərarların, o cümlədən, işdən ayrılma və kompensasiya paketlərinin həmin dövrdə qüvvədə olan qaydalara uyğun olaraq müvafiq rəhbərlər tərəfindən təsdiqləndiyini bildirib.

İnfantino 2000-ci ildə UEFA-da fəaliyyətə başlayıb və 2016-cı ilin fevralında FIFA prezidenti seçildikdən sonra qurumdan ayrılıb. O, UEFA-nın baş katibi vəzifəsində çalışdığı dövrdə Avropa futbolunun idarəçiliyində əsas fiqurlardan biri olub.

İnfantinonun şəxsi həyatı ilə bağlı irəli sürülən bu iddiaların onun FIFA rəhbərliyi ilə bağlı onsuz da artan tənqidlərin fonunda gündəmə gəlməsi diqqət çəkir.

İnfantino hazırda evlidir və dörd övladı var. Onun həyat yoldaşı Lina Əl Aşqarla futbol vasitəsilə tanış olduğu və cütlüyün 2001-ci ildə evləndiyi bildirilir.

“The Telegraph” qadının İnfantinonun iddia edilən münasibətindən xəbərdar olub-olmadığının məlum olmadığını yazır.

“The Telegraph”ın geniş araşdırması çərçivəsində nəşr bir neçə şahidlə danışıb. Mənbələrdən biri İnfantinonun həmin dövrdə “böyük səhvə yol verdiyini” və bunun onun karyerasına ciddi təhlükə yaratdığını iddia edib.

Mənbənin sözlərinə görə, UEFA daxilində bəzi əməkdaşlar məsələdən xəbərdar olduqdan sonra Mişel Platiniyə müraciət edərək qadının işdən uzaqlaşdırılmasını tələb ediblər.

Başqa bir məlumatlı şəxs isə Platininin İnfantinoya seçim qarşısında qaldığını bildirdiyini iddia edib: “Ya o, ya da sən”.

Mənbələrin bir neçəsi Platininin İnfantinoya qadının və ya onun özünün UEFA-dan ayrılmalı olduğunu dediyini irəli sürüb. İddialara görə, İnfantino nəticədə qadının təşkilatı tərk edəcəyini bildirib və o, UEFA-dan ayrılıb.

Nəşr qadına ödənilən kompensasiya və MBA təhsilinin maliyyələşdirilməsi məsələsini UEFA-nın vəsaitlərindən istifadəyə dair daha geniş müzakirə kontekstində təqdim edir.

UEFA öz rəsmi məlumatlarında gəlirlərinin böyük hissəsinin futbolun inkişafına qaytarıldığını bildirir. Qurumun məlumatına görə, xərclər minimum səviyyədə saxlanıldıqda xalis gəlirin 97,5 faizi futbolun inkişafına yönəldilir.

UEFA-nın maliyyələşdirdiyi layihələrə qadın və qız futbolunun inkişafı, ayrı-seçkiliyə qarşı mübarizə, sosial və ekoloji davamlılıq təşəbbüsləri, futbolçuların təhsili, keçmiş oyunçuların yeni karyeralara keçidinə dəstək, həmçinin stadion və akademiyaların tikintisi kimi infrastruktur layihələri daxildir.

İddialar İnfantinonun UEFA-dakı karyerasına və sonrakı yüksəlişinə də yeni prizmadan baxılmasına səbəb olub.

İnfantino 2000-ci ildə UEFA-ya hüquqşünas kimi qoşulub. Sonrakı illərdə təşkilatda müxtəlif vəzifələrdə çalışaraq tədricən rəhbər mövqelərə yüksəlib.

Baş katib vəzifəsində olduğu dövrdə isə UEFA əməkdaşları arasında ünsiyyətcil və əlçatan rəhbər kimi tanındığı, sıravi işçilərlə keçirilən tədbirlərdə iştirak etdiyi bildirilir.

Lakin “The Telegraph”ın yazdığına görə, qadının UEFA-dan ayrıldığı dövrdə İnfantinonun rəhbərlik ambisiyalarının daha da gücləndiyi görünürdü.

2016-cı ildə Mişel Platini başqa bir qalmaqal fonunda UEFA prezidentliyindən uzaqlaşdırıldıqdan sonra İnfantino FIFA prezidentliyi uğrunda mübarizədə UEFA-nın əsas namizədi kimi ön plana çıxıb.

İnfantino həmin il FIFA prezidenti seçilib və o vaxtdan dünya futbolunun ən yüksək vəzifələrindən birinə rəhbərlik edir.

İnfantinonun keçmiş həmkarlarından biri onun idarəçilik yanaşmasını tənqid edərək, məqsədə çatmaq üçün müxtəlif vasitələrdən istifadə etməyə meyilli olduğunu iddia edib. Mənbə həmçinin İnfantinonun futbol infrastrukturunun inkişafına imkan verəcəyi təqdirdə mübahisəli siyasi fiqurlarla belə əməkdaşlıq etməyə hazır olduğunu bildirib.

İnfantinonun UEFA-dakı fəaliyyəti ilə bağlı iddialar onun dünya çempionatının kommersiyalaşdırılması planının iflasa uğramasından cəmi bir həftə sonra gündəmə gəlib.

Mişel Platini isə nəşrin məsələyə münasibət bildirmək xahişinə cavab verməyib.

• “Sevgilisinin maaşı 160 minə qaldırılıb, vəzifəsi yüksəldilib” - Şok iddia
• Dağlara sığınmış mavi palitra - Səma yerə necə endi? - Fotolar
• Azərbaycanda bu məşhur məkana giriş pullu oldu - Video
• Sənədsiz ev sahiblərinin nəzərinə: Çıxarış almaq üçün...
• Komitə rəsmisindən valideynlərə müraciət: Erkən evlilik...
• "Əhmədli"də küçə satıcıları yığışdırıldı - Video
• Azərbaycanda vergi borcları 4 milyardı ötdü
• Toyu çəkən İTV əməkdaşlarına hücum edildi - Video