“Şəkər xəstələrinin istifadə etdikləri “Synjardy” adlı dərman preparatının son iki ildir, bir qutusu 72-74 manata satılırdı. Təxminən, iki həftə öncə bu dərman birdən-birə şəbəkədən itdi. Elə həmin ərəfədə "Siqduo Lonq" peyda oldu və bütün apteklərdə birinci dərmanın əvəzedicisi kimi 230 manata satılmağa başladı. Üç dəfə baha... Birinci dərmanın taleyi nə oldu? Artıq Azərbaycana çatdırılmır. Bununla əlaqədar tapşırıq verdim, təxminən, 30-40 aptekə baxıldı. Hamısında eyni sözü dedilər, ““Synjardy” yoxdur, əvəzedicisi var, birə-birdir...” Həkimlərlə də məsləhətləşdim. Dedilər ki, bəli, əvəzedicini istifadə etmək olar. Bəs qiyməti niyə bu qədər bahadır? Həkimlər dedilər ki, bunu biz bilmirik, dərman ticarəti ilə məşğul olanlar bilər. Məsələnin izinə düşdüm. Niyə qeyri-insani, qeyri-müsəlmani addım atılır. Dedim, bəlkə, zavod partlayıb, birinci dərman istehsal olunmur, yaxud nəsə faciəvi bir şey olub. İki ildir, sözügedən dərman Azərbaycana gəlirdisə, indi gəlmirsə, burada ağlabatan səbəb olmalı idi. Səhiyyə sektorundan bu işi bilən biri ilə məsləhətləşdim. Təxminən, bir gün sonra mənə xəbər verdi ki, bu dərmanlar Tarif Şurasından keçməyib. Yəni Şuranın siyahısına düşməyib, ölkəyə şirkətlər tərəfindən gətirilib. Onlar da müstəqil formada qərar verirlər...”
Bu sözləri açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyev deyib.
“Yenidən bir neçə ekspertdən soruşdum. Cavab verdilər ki, dərmanların qiyməti arasında bu qədər fərq ola bilməz. Hətta "Synjardy"nin istehsalçısı çox məşhur bir şirkətdir. İnterdən kifayət qədər məlumat əldə edə bilərsiniz. Sadəcə, bu, çox köhnə fırıldaqdır. Bir dərmanı ölkədə mənimsədirlər, insanlar hiss edirlər ki, bu dərman onlara yaxşı təsir edir, həkimlər də bəyənirlər, çünki həqiqətən keyfiyyətli dərmandır. Sonra fırıldaq nəticəsində tərkibi eyni olan və başqa zavodun istehsal etdiyi digər dərman ölkəyə gətirilir. Qiyməti isə iki-üç dəfə artırılır. İnsanlar da məcbur qalıb 73 manatlıq dərmanın əvəzinə 230 manatlıq dərmanı alırlar. Bu, birinci hal deyil. Hamının yadındadır ki, təxminən, üç il əvvəl başqa bir dərmanla bağlı çıxışlar etdim. Onda da 1 qramlıq ampulaların əvəzinə 0,5 ml ampula eyni qiymətə satılırdı. Həmin çıxışımdan sonra əməlli başlı problemlər yarandı. Mənə müraciətlər oldu, söz verildi ki, dərman 1 qramlıq ampula ilə Azərbaycana çatdırılacaq. Bu günə qədər də çatdırılır, həmin qiymətə satılır... Artıq məndə suallar yaranır. Yenə də deyirəm, iki dərman da keyfiyyətlidir. Amma 3 dəfə baha? Bu, böyük sual işarəsidir. Bu işdə marağı olan müəyyən “tüccarlar”, onlara kömək edən məmurlar var. Təsəvvür edin, bir xəstə ayda iki qutu əvəzedici alsa, deməli, 460 manat pulu verməlidir. Bayramdan əvvəl bununla bağlı komitə iclasında da çıxış etdim, dərmanların adını da çəkdim. İstəyirəm ki, məsələni ictimaiyyət də bilsin. Bundan sonra isə suallarım rəsmi formada dövlət qurumlarına olacaq. Siz buna necə nəzarət edirsiniz? Münasibətiniz nədir? Belə başa düşdüm ki, həmin dərmanlar ölkəmizə dövlət xətti ilə gəlmir. Bəs necə gəlib? Bunun qiymətini kim müəyyənləşdirir? Kim icazə verir ki, bu qiymətə dərman satılsın?”
- Bayden də təbrik etdi: bəs, COP29-dan biz nə qazandıq?
- Türkiyə Bakıya böhtan atan jurnalisti qovdu
- Bayden Ukrayna ilə bağlı daha bir sensasion qərara hazırlaşır
- Kopırkindən sülhlə bağlı mühüm açıqlama: Moskva istəyir ki...
- Azərbaycana “petrostate” deyənlər, 2026-dən yeni ixrac olacaq
- ABŞ-dan “sürpriz”: Ərdoğan Putinə zəng etdi - Nə baş verir?
- Ermənilər azərbaycanlıların qəbiristanlığını dağıtdı - Video
- Ermənistana silah daşınır – MN narahatdır, çağırış etdi