Sürətlə dəyişən dünyada hər bir ölkənin qarşısında duran əsas çağırışlardan biri vətəndaşların işlə təmin olunması, əmək bazarının müasir dövrün tələblərinə uyğunlaşdırılmasıdır. Bu baxımdan, Azərbaycanda qəbul edilən 2026–2030-cu illəri əhatə edən Məşğulluq Strategiyasının Tədbirlər Planı ölkəmizin sosial-iqtisadi həyatında mühüm bir mərhələnin əsasını qoyur. Ekspert Ruslan Eldaroğlu deyir ki, yeni sənəd sadəcə iş yerlərinin açılmasını deyil, həm də həmin iş yerlərinin keyfiyyətini, təhlükəsizliyini və gələcəyin tələblərinə cavab verməsini hədəfləyir.
Onun sözlərinə görə, sənədin gətirdiyi ən mühüm yeniliklərdən biri əmək bazarının rəqəmsallaşması və qabaqcıl texnologiyaların tətbiqidir. Artıq işaxtaranlarla işəgötürənlərin əlaqələndirilməsində süni intellekt imkanlarından istifadə olunması nəzərdə tutulur.
Sitat: “Bu o deməkdir ki, vətəndaşlar öz bacarıqlarına və təcrübələrinə ən uyğun vakansiyaları daha tez və proaktiv şəkildə tapa biləcəklər. Eyni zamanda, "Peşələr üzrə elektron atlas"ın yaradılması gənclərə gələcəkdə hansı peşələrin daha çox tələb olunacağını əvvəlcədən görməyə və düzgün ixtisas seçməyə kömək edəcək”.
Strategiyada yaşıl iqtisadiyyat və ekoloji təmiz texnologiyalar da diqqət mərkəzindədir. Qlobal ekoloji çağırışlara uyğun olaraq, işçi qüvvəsinin "yaşıl bacarıqlar" üzrə yenidən hazırlanması təmin ediləcək. Bu isə həm ölkənin iqtisadi inkişafına töhfə verəcək, həm də vətəndaşlara müasir standartlara cavab verən gəlirli sahələrdə çalışmaq imkanı yaradacaq.
R.Eldaroğlunun fikrincə, digər diqqətçəkən məqam özünəməşğulluq və sahibkarlığın dəstəklənməsidir. Proqram çərçivəsində kiçik biznesə başlayan şəxslərə sadəcə birdəfəlik dəstək verilməklə kifayətlənilmir, onların gələcəkdə dayanıqlı mikro sahibkarlara çevrilməsi üçün məsləhət və təlim xidmətləri genişləndirilir. Həmçinin istehsalat müəssisələrində "usta-şagird" kimi birbaşa iş yerində öyrənmə mexanizmlərinin təkmilləşdirilməsi peşə təhsili alan gənclərin real iş mühitinə tez uyğunlaşmasına şərait yaradır.
Unutmaq olmaz ki, bu strategiya həm də həssas qrupların (gənclərin, qadınların və əmək bazarında dəstəyə ehtiyacı olan digər şəxslərin) fəallığının artırılmasına xidmət edir. Regionlarda gənclərin startap layihələrinin təşviqi, qadınların iqtisadi proseslərə daha geniş cəlb olunması ölkə üzrə balanslı inkişafı təmin edəcək.
Bir sözlə, dövlət proqramı hər bir vətəndaşın potensialını tam reallaşdıra biləcəyi, şəffaf, rəqəmsal və imkanlarla zəngin əmək bazarının qurulmasına istiqamətlənmiş güclü yol xəritəsi olacaq.
- Arzumun növbəti məhkəməsidir - Amalın xanımı hökmdən narazıdır
- Bakıda bəzi liftlərin fəaliyyəti dayandırıldı
- Bakı bu reytinqində ilk 100-lüyə daxil oldu
- Yeni dövrün əmək bazarı: Məşğulluq Strategiyası bizə nə vəd edir? - Ekspert şərhi
- Nigar Rüstəmliyə yüksək vəzifə verildi
- Dənizdə iki nəfər xilas edildi
- “Uşaqlığın son gecəsi”nin Rüfəti vəfat etdi
- “Demişdi ki, öləndə qəbiristanlığa bir piano gətirim...” - Videomüsahibə